ንባባት፡ 2ቆሮንጦስ 8፡1~10 ራእ 12፡1~13 ግ.ሓ. 1፡12~14 ዮሓ 19፡25~2

መዝሙር፥ ወመኑ መሓሪ ዘከማከ. . . ። “ሥራሕ ጥበቡ ዘገርም ዘደንቕን እዩ እቲ አብ ሰማየ ሰማያት ዘሎ ኣባና ምሕረቱ ገለጸ. . . ምስ ኖኅ ኪዳን ዝአቶኻ ንደቂ እስራኤል መና ዘውረድካሎም ከማኻ ዝበለ መሓሪ መን አሎ፥ ኩሉ እዩ ካባኻ ዝጽበ ከማኻ መሓሪ መን አሎ” እናበለ መጨረሻ ነቲ ዘፍቅሮ ሓደ ወዱ ንስብከትን ንመስዋዕትን ብምስዳዱ ምሕረቱ ገለጸ።

፫ይ ሰንበት ዘጽጌ ማርያም አደ ቤተክርስትያን ብዝብል አርእስቲ ክነስተንትኖ።

አብ ክርስትያናዊ እምነትና ንማርያም በቲ ምስ አምላኽ ዘለዋ ርክብ ዝተፈላለየ አስማት ንህባ፥ አደ አምላኽ፥ አደ ቤተክርስትያን፥ ንጽሕቲ ድንግል፥ አደ ሕያዋን. . . .ንብላ። ንማርያም ዝተፈላለየ አስማት እንህባ ብኽልተ ምኽንያት ክኸውን ይኽእል፥ ሀ. ሰባት ብባሕርይና ንሓደ እንፈትዎ ወይ ፍሉይ ነገር ዝገብር በቲ ዝገበሮ ስም ንህቦ እዚ ኸአ ናቱ/ታ እንታይነት ክንገልጽ፥ ስለ እንፈትዎ/እነፍቅሮ መግልጺ ፍቕርና ዝተፈላለየ ስም ንህቦ። ለ. ንማርያም ብዙሕ አስማት ምሃብ ዕምቆትን ናይ እቲ ንሳ አብ ጉዳይ ድሕነት ዝተጻወተቶ ተራ ንምግላጽ እዩ። ንሳ ዝተፈላለየ አስማት አልአ ምኽንያቱ አምላኽ ብዝተፈላለየ መንገዲ ብአአ ገሩ ፍቕሩን ምሕረቱን ገሊጹልና እዩ። አደ ንብላ አደ ዝብል ቃል ንሓንቲ ዝወለደት ዝውሃብ ቃል እዩ እዚ ኸአ ንሳ ምንጪ ናይ ሓዲስ ሕይወት ምዃና ዝገልጽ እዩ፥ ሕይወት ከአ አብ ናይ ነፍሲ ወከፍና ምንባር ዝለዓለ ነገር እዩ። ማርያም አደ ኢየሱስ ብትስብእቱ እያ። ኢየሱስ አምላኽ፥ ቃል፥ ካልአይ አካል ቅድስት ስላሴ እዩ። ስለዚ አደ አምላኽ እያ። አብ ጉባኤ ኤፈሱስ ብ431 ዓ.ም. ብዕሊ ተአዊጁ እምነት ቤተክርስትያን ከአ ኮይኑ ካብኡ ንድሓር አደ አምላክ ለምንልና ንብላ።

አብ ምውዳእ ካልአይ ጉባ ቫቲካን ጳውሎስ ፮ ብዕሊ አደ ቤተክርስትያን ዝብል ስም ሂቦማ። እዚ ኸአ ናይ ማርያም መንፈሳዊ አደነት ንነፍስወከፍ አማናይ ንምግላጽ እዩ። ክርስቶስ ርእሲ ክኸውን እንከሎ፥ ቤተክርስትያን ከአ ሰውነቱ እያ፥ ክርስቶስ ሰውነቱ ካብ ማርያም ካብ ወሰዶ ንሳ አደ ቤተክርስትያን እያ።

እምብአር ሓደ ካብቲ ንማርያም ዝውሃብ አስማት አደ ቤተክርስትያን ዝብል እዩ። ንሳ አደ ክርስቶስ ጥራሕ አይኮነትን እንታይ ድአ አደ ኩላትና እያ። አብ ብዙሕ ብራናታት አበውን ትምህርቲ ቤተክርስትያን አደ ሕያዋን ዝብል ንረክብ። ንሳ አደ ዘብላ ንኢየሱስ መድሓኒና ወሊዳ ምስኡ ብእምነትን ጥምቀትን ተወሃሂዳ በዚ ንሕና ናይ እታ ሰውነቱ ዝኾነት ማሕበር አባልት ሰውነቱ ንኸውን። ንሕና አባላት ሰውነት ክርስቶስ ስለ ዝኾና ማርያም ከአ ብሥጋ ንክርስቶስ ስለ ዝወለደት አሕዋት ክርስቶስ ደቂ ማርያም ኢና። እዚ አደነት ማርያም ብአካላዊ ውልዱነት ዘይኮነ ብመንፈሳዊ ምውላድ እዩ።

ንማርያም አደ ዘብላ አብ ክልተ ቀንዲ ነገራት ናይ ሕይወታ ዝተመስረተ እዩ፥

አብ ጊዜ ብስራት ብገብርኤል መልአኽ ንዝተነግራ ቃል ንአምላኽ እሺ ኢላ ፥ ንሳ አደ መስሕ ክትከውን ብምሉእ እሽታ ብምቕባላ። ብእሽትአ ነታ ብወዳ እትምስረት ማሕበር አቐዲማ ፈላሚታ ኮይና። አብ ኩሉ ሓዋርያዊ ጉዕዞኡ አሰንያቶ ድሕሪ ሞቱ ነታ ዝመስረታ ማሕበር አካቢታ አጸናኒዒታ ኾይና ተረኺባ።

አብ ቃና ዘገሊላ አብ ዝተገብረ መርዓ ንወዳ ንመሲሓዊ ስልጣኑ ተጠቒሙ ገለ ክገብር ለሚናቶ ተአምራቱ ብናታ ልመና ጀሚርዎ በዚ አብኡ እምነት ክገብሩ ጀማሪት ኮይና፥ ብኻልእ አዘራርባ ማርያም ንወዳ መን ምዃኑ ከምዝፈልጥዎ ገራ። ሓዋርያትን አብቲ መርዓ ዝነበሩ ህዝብን ብሓገዝ ማርያም ክፈልጥዎ ክኢሎም። ወዳ መን ምዃኑ ክፈልጡ ሓጊዛቶም።

እሺ/ሐራይ ክትብል እንከላ ብመንጽር አብ መስቀል አብ ቀራንዮ እዩ ማለት ንሳ ብመንፈሳ አብቲ ናይ ወዳ ስቓይን ሞትን ተሳቲፋ፥ አብቲ ምእንቲ ድሕነት ኩሉ ዓለም ዘቕረቦ መስዋዕቲ ተሳቲፋ። ብዘይ ናታ እምነትን ተአዝዞን መድሓኒ፥ድሕነት፥ ቤተክርስትያን አይምሃለወን። ማለት አምላኽ ብአአ ክዓዪ ደልዩ ካልእ መንገዲ አይሃበናን፥ ነዚ ኸአ ንአምን።

ማርያም አብ ሞንጎ ግላውን ሓባራውን ሕይወትና ህልውቲ ክንገብራ ማለት ከምቲ አብ መጀመርታ ንቤተክርስትያን ዝመርሓታ ሎሚ እውን ረድኤታ፥ ጸሎታ፥ ሓልዮታ፥ ከይፍለየና። ብፍሉይ አብ ጽንኩር እዋን አብ ዘሎናሉ ጊዜ ናታ ረድኤት የድልየና እዩ።

ማርያም ንቤተክርስትያን ንስብከት ቅድሚ ምውፋራ መሪሓታ፥ አጸልያታ፥ ልዕሊ ኹሉ ኸአ ፍቕሪ ቅዱስ ቍርባን ከምተሕድር ገራታ። ሓደ ካብቲ ንቀዳሞት ክርስትያን ብዝያዳ ዝጥርንፎም ዝነበረ አብ ምአዲ ቅዱስ ቍርባን ብሓንሳብ ይሳተፉ ስለዝነበሩ እዮም። ሰነበት ሰንበት እንሳተፎ መአዲ ቝርባን እዚ መንፈስ ከልብሰና ይግባእ። እታ ንምድሓኒና ሥጋ ዘልበሰት አደ እሞ ባዕላ አብቲ መስዋዕቲ ምእንቲ ኩልና ክስዋዕ እንከሎ ዝተሳተፈት ሎሚ እውን አብ መስዋዕቲ ቅዳሴና ምሳና ኮይና ነቲ ሓደ መስዋዕቲ ተዕርጎ አላ።

አደ ዘላቶ ቅሱን፥ ርእሰ ተአማነንት ይሕድር። ብፍላይ አብ ንኡስ ዕድመ ናይ አደ ተራ ዓቢ እዩ። ማርያም አደና ንግበራ ካብ ወዳ ጸጋ ክተውርደልና ልብና ንኽፈተላ። ኩሉ ጸገምና ነደና ንነግር ሽዑ ድላይና ንረክብ። ማርያም ምሕጋዝ ባሕርያ እዩ። ኩሉ ጊዜ ክትሕግዝ ትደሊ ሓንትስ ንሕና ንቕረባ እምበር። አብ መንጎ ማሕበርናን ቤተክርስትያና ክትሓድር ሎሚ ክንዕድማ ክንዛረባ እዋኑ እዩ።

አብ ገዛና ብስድራ መልክዕ ብግልና መቝጸርያ፥ ውዳሴ ማርያም፥ ክንደግም ጽቡቕ እዩ፥ አብኡ ትምህርተ ወንጌልን ትምህርቲ አበውን ኢና እንደግም። ናይ ማሕበርን ናይ ግልን ጸሎት ገርና ብስም ማርይም ተለመነልና ንበሎ። ንሳ ወደይ ዝበለኩም ግበሩ ትብለና አላ።